Kryeministri i Pakistanit: Në Kashmir mund të përsëritet Srebrenica

Kryeministri i Pakistanit, Imran Khan, ka paralajmëruar mundësinë e një masakre të re dhe spastrimit etnik të myslimanëve në Kashmir.

Ai për këtë kujtoi atë që kishte ndodhur 24 vite më parë në Srebrenicë, ku myslimanët u masakruan nga forcat serbe.

“A do të vëzhgojë bota në heshtje masakrën dhe spastrimin etnik të myslimanëve në Kashmir, ashtu siç bëri me Srebrenicën,” pyeti Khan në Twitter.

“Dua të paralajmëroj bashkësinë ndërkombëtare që nëse lejohet të ndodhë, ajo do të ketë pasoja të rënda dhe do të provokojë reagime në botën myslimane duke shkaktuar radikalizëm dhe cikle dhune”, tha ai.

Në gusht India i hoqi rajonit të Kashmirit autonominë duke bërë që tensionet mes Pakistanit dhe Indisë të rriten.