fbpx

Ministrja Hajdari me përfaqësues të CEFTA-s: Kosova qe e detyruar ta vë taksën ndaj Serbisë

Ministrja e Ekonomisë, Punës, Tregtisë, Industrisë, Ndërmarrësisë dhe Investimeve Strategjike, Rozeta Hajdari takoi përfaqësues të CEFTA-s, ku siç theksohet në kumtesë, biseduan për pika të rëndësishme për të eliminuar barrierat tregtare dhe për të fuqizuar rolin e Kosovës integrimin rajonal.

Sa i përket “taksës 100% dhe reciprocitetit”, ministrja Hajdari bëri të ditur se janë duke shqyrtuar të gjitha mundësitë dhe së shpejti, siç thotë ajo, “do të dalim me një propozim”.

“Por sigurisht duhet të kuptohet drejtë se Kosova ka qenë e detyruar që të veprojë në këtë mënyrë, duke marrë parasysh qasjen dhe diskriminim që i është bërë Kosovës në raportet tregtare nga vendet anëtare të CEFTA-s”, tha ajo.

Hajdari theksohet se u zotua se do të procedojë “Protokollin Shtesë 5 dhe 6” të CEFTA-s në Parlamentin e Kosovës për t’i ratifikuar në një periudhë sa më të shpejtë.

Ndërsa, në “Protokolli Shtesë 7”, ministrja thotë se do të angazhohet që procedurat në Qeveri të përfundojnë sa më shpejt në mënyrë që të bëhet zyrtarisht Ekipi negociator i Kosovës.

“Për ne është e rëndësishme që të avancojë ky proces pasi që do të fuqizonte mekanizmin e zgjidhjes së mosmarrëveshjeve tregtare, e që fatkeqësisht rajoni jonë përballet vazhdimisht me barriera tregtare”, u shpreh Hajdari.

Gjithashtu, në takim, ministrja potencoi se edhe në pikën “Plani Shumëvjeçar i Veprimit 2.0”– Kosova përkrah çdo iniciativë, që kontribuon në avancimin e bashkëpunimit rajonal dhe gjithmonë në përfitim të të gjitha vendeve të CEFTA-s.

“Për ne është e rëndësishme që të kemi një bashkëpunim të shëndoshë me të gjitha vendet e rajonit, duke punuar në mënyrë aktive për eliminimin e të gjitha barrierave jo-tarifore, prandaj kërkoj një rol edhe më aktiv të Sekretariatit të CEFTA-s në drejtim të identifikimit dhe zgjidhjes së barrierave tregtare”, tha Hajdari.

Ministrja Rozeta Hajdari potencoi se shpreson që procesi i njohjes së kualifikimeve profesionale të avancojë dhe u zotua se Sekretariati do ta ketë përkrahjen e saj në këtë proces për të gjetur zgjidhjen më të mirë të mundshme në rrethanat aktuale në të cilat gjendet rajoni jonë.