Së paku 11 të vrarë në një sulm në Afganistan

Së paku 11 njerëz janë vrarë në një sulm vetëvrasës në një tubim në Kabul, i cili u mbajt nga mbështetësit e Mohammad Atta Noor, guvernator i provincës Balk të Afganistanit.

Noor, kritik i zëshëm i presidentit afgan, Ashraf Ghani, dhe ish-lider i një milicie në Aleancën Veriore anti-Talibane, nuk ka qenë në tubim në kohën e sulmit.

Policia e Kabulit i tha Radios “Afganistani i Lirë” se së paku nëntë policë dhe dy civilë janë vrarë në sulmin vetëvrasës.

Ministria e Mbrojtjes e Afganistanit, tha se sulmuesi ka pasur të veshur jelek vetëvrasës dhe ka bërë përpjekje të hyjë në ndërtesën e saj, por është ndaluar nga rojet e sigurisë.

Sulmuesi i ka shpërthyer eksplozivët pasi është ndaluar nga policia.