Trajneri i Werderit flet për gjendjen e Milot Rashicës!

Milot Rashica po ndien dhimbje në shpinë, por trajneri Florian Kohfeldt beson në rikthimin e shpejtë të futbollistit kosovar
Milot Rashica është njeriu më i përfolur i kësaj jave në futbollin gjerman

Futbollisti kosovar po kalon formë të jashtëzakonshme në vitin 2019, kur i ka realizuar 4 gola.

Vushtrriasi realizoi dy gola në fitoren 4:0 ndaj Augsburgut fundjavën që shkoi, por u detyrua të largohej në minutën e 36-të për shkak të dhimbjeve që ndiente në shpinë.

Por, edhe pse është vënë në pikëpyetje paraqitja e tij të shtunën ndaj Hertha Berlinit, trajneri Florian Kohfeldt është optimist se përfaqësuesi kosovar do të jetë gati me kohë për duelin e rëndësishëm.

“Ne kemi bërë kërkim të detajuara dhe e kemi nxjerrë përfundimin se nuk ka diçka dramatike”, ka thënë trajneri i Werderit pas stërvitjes së sotme, ku Rashica ushtroi me ekipin.

“Ne tentuam sot që ta toleronim përdorimin e ushtrimeve të plota për Milotin. Në kushte normale, nuk do të duhej të kishte ndonjë problem për fundjavë”, ka shtuar trajneri Kohfeldt.

Paraprakisht, drejtori sportiv i Werder Bremenit, Frank Baumann kishte thënë se për Rashicën gjithçka do të vendoset të enjten ose të premten.

Ndërkohë, ai kishte thënë se Werderi nuk do të rrezikojë me futbollistin vushtrrias.